वनकरिया समुदायकी पहिलो एसएलसी उत्तीर्ण पम्फा पढ्नबाट बन्चित

Plus 2 College in Nepal

                           लोपोन्मुख वनकरिया समुदायबाट एसएलसी उत्तीर्ण एक मात्र छात्राले गरिबीको कारण पढ्ने अवसरबाट बन्चित भएकी छन ।

‘सी’  ग्रेडमा एसएलसी उत्तीर्ण भएकी मकवानपुर हाडीखोला गाविस ७ मुसेधापकी पम्फा वनकरियाले प्राविधीक विषय अध्ययन गर्नका लागि नवलपरासी गैडाकोटस्थित कालिका टेक्निकल ईन्सिच्युटमा पढ्न प्रवेश परीक्षा दिएकी थिइन । तर इन्सिच्युटले स:शुल्करुपमा अध्ययनका लागि वैकल्पिकमा नाम प्रकाशित गरेको छ ।

ल्याब असिसटेन्टमा नि:शुल्क पढ्नका लागि उनले प्रवेश परीक्षा दिएकी थिइन् । उनको आर्थिक अवस्था अत्यन्त दयनीय रहेकाले शुल्क तिरेर पढ्ने अवस्था छैन । सुशल्क पढ्न एक लाख रुपैयाँ लाग्ने उने बताइन् ।

छात्राबासको खर्च स्थानीय अच्युत अधिकारीले पूर्णरुपमा सहयोग गर्ने प्रतिवद्धता जनाएका छन तर ईन्सिच्युटले लोपोन्मुख समुदायकी एकमात्र छात्रालाई अध्ययन गर्नका लागि छात्रावृत्ति नदिएका कारणले पम्फाको पढ्ने धोको पुरा नहुने भएको हो । वनकरिया समुदायबाट एसएलसी उत्तीर्ण गर्ने उनीमात्र व्यक्ति हुन् ।

पम्फाले बसामाडीस्थित निर्मल उच्च माबिवाट एसएलसी परीक्षा दिएकी थिइन ।

‘लोपोन्मुख समुदायवाट वल्लवल्ल एसएलसी उत्तिर्ण गरेकी पम्फालाई राज्यले नै आवासीय सुविधासहितको छात्रावृत्ति दिएर पढाउनु पर्छ’, नेपाल आदीवासी जनजाती महासंघ मकवानपुरका अध्यक्ष तीर्थवहादुर थापाले भने ।

नर्सिङ पढ्ने ईच्छा भएकी पम्फाको विज्ञान विषयमा ‘सी’ ग्रेड नआएकाले ल्याव असिस्टेन्ट पढ्नका निम्ति प्रवेश परीक्षा दिएकी थिइन ।

बिहान बेलुका हातमुख जोड्न समस्या रहेको परिवारकी पम्फा ‘हामीजस्ता गरिब र पछाडी परेकाले  पढ्न पाइदो रहेनछ’ भन्दै निराश भएकी छन् ।

मकवानपुरबाहेक अन्यत्र वनकरिया समुदायको बसोवास छैन । डेढ दशकअघिसम्म वनकरिया समुदाय चुरे क्षेत्रमा फिरन्ते जीवन बिताउँदै आएका थिए । हाँडीखोला गाविस मुसेधापमा वनकरिया जातीको १७ घरधुरीमा ९५ जनाको बसोवास छ ।

सरकारले वनकरिया समुदायलाई राज्यको मुलधारमा ल्याउने उद्देश्यले विगत ६ वर्षदेखि प्रत्येक वनकरियालाई मासिक एक हजार रुपैयाँ सामाजिक सुरक्षा भत्ता दिंदै आएको थियो । साउन महिनादेखि सामाजिक सुरक्षा भत्ता २ हजार रुपैयाँ भएको छ ।

सामाजिक सुरक्षा भत्ता र केही सहयोगीको कारणले  पम्फा वनकरियाले एसएलसीसम्म पढन सम्भव भएको हो ।